Covid-19 vangin Nagaland environment minister a thi

Nagaland minister for environment, forest & climate change leh justice & law, CM Chang chu Thawhṭanni tlai khan Covid-19 vangin a thi. Nagaland-ah hian hripui vanga thi hi mi 13 an awm tawh a ni. 

Chang hi October 4 khan hri a kai tih hriat a nih hnuah Naga Hospital Authority Kohima (NHAK) dah luh a ni a, natna dang nei sa a nih avangin a dinhmun pawh a ṭha lo nghal hle. Thawhṭanni tlai khan a thi a, health official-te chuan a thih chhan hi Covid-19 vang a ni tih an sawi. 

Minister ruang hi an khua, Tuensang district-a Noksen khuaah Thawhṭanni zan  khan phurh thlen nghal a ni a, nimin khan state chawimawina nen vui liam a ni. 

Chang hi IAS officer pension niin, kum 2003-2012 chhung khan Naga People's Front party vice president a ni. Kum 2009 khan Lok Sabha member atan thlan tlin a ni a, kum 2013-ah state lamah kir lehin assembly inthlanah Noksen bialah thlan tlin a ni a, NPF sor­kar­ah education minister a ni. Kum 2018-ah  NPF chhuahsanin, Nationalist Democratic Progressive Party (NDPP) a zawm a, hemi  kuma assembly inthlanah a bial ngaiah bawk thlan tlin leh a ni.  

People’s Democratic Alliance (PDA) sorkarah Environment, Forest & Climate Change leh Justice & Law minister atan ruat a ni a, a thih ni thlengin he dinhmun hi a chelh a ni. 

Nagaland governor RV Ravi leh chief minister Neiphiu Rio bakah hruaitu hrang hrangte chuan Chang an ui thu an sawi a, CM Rio chuan Chang chu mi chak tak, gentleman dik tak leh mi tam tak tana pa nih tling a ni, a ti. 

State sorkar chuan Chang hi state pumah ni hnih chhung, nimin leh vawiinah sun a ni dawn tih sawiin, hemi hun chhung hian hnam puanzar chu a ngul chanve ah zar a ni ang a, sorkar lam aṭangin intihhlimna lam chi buatsaih khap a ni bawk ang.