Assam leh AP-in ramri buaina chinfel dan ngaihtuah dawn

Assam leh Arunachal Pradesh sorkar chuan hun rei ta chhung ramri chungchanga buaina an neih chu chinfel dan ngaihtuahin inter-state coordination meeting neih ṭhin an rel. 

Thawhṭanni khan Itanagar-a Civil Secretariat-ah state pahnihte hian high-level meeting neiin, he hunah hian Assam aiawhte chu chief secretary Kumar Sanjay Krishna'n a ho a, additional chief Secretary (Home, Political, Border Protection and Development Department) Jishnu Barua leh DGP Bhaskar Jyoti Mahanta-te an tel. Arunachal Pradesh lam aṭangin chief secretary Naresh Kumar hoin Home Commissioner Kaling Tayeng, DGP RP Upadhyaya, IGP (Law & Order) Chukhu Apa, Lower Siang Deputy Commissioner AK Singh, Lower Dibang Valley DC Mitali Namchoom, Papumpare DC Pige Ligu and SP Jimmy Chiram, SP (SB) John Pada, Border Affairs Director Hage Lailang leh Joint Direc­tor Nighe Bengia-te an tel. 

Thuchhuah an siamah, meeting-ah ramri kaihhnawih buaina hrang hrang awm ṭhinte ngaihtuah a nih thu leh, buaina chinfel dan ngaihtuaha state pahniha ramri bul district-a DC, SP leh District officer-te awmna district-wise committee din a, mumal taka meeting neih ṭhin an rel a ni. Ramri chungchangah buaina a awm leh a nih pawhin top official-te ngaihtuah tura dah a, boruak ṭha tak hnuaia buaina chinfel dan ngaihtuah ṭhin an rel a ni.