Meghalaya-in GHADC inthlan hun sawn

Meghalaya sorkar chuan  Garo Hills Autonomous District Council (GHADC) inthlan neih tur chu Covid-19 leng avangin a sawn hla a, GHADC-ah thlaruk chhung atan administrator's rule a puang nghal. 

Chief miniter Conrad K Sangma chuan state chhung hri leng dinhmun azirin inthlan neih hun tur hi la ngaih­tuah ṭhat leh a ni dawn tih a sawi. 

Sangma chuan, "Tun din­hmunah chuan inthlan buatsaih hi thil buaithlak tak a ni rih a ni. Hei vang hian state sorkar chuan health department lam thurawn a la a, inthlan neih chu mipuite dinhmun hlauhthawnawm taka dah theihna a nih avangin sawn a rel a ni," a ti. 

GHADC term kal mek hi October 18 hian a tawp dawn a, inthlan hi kumin kum tawp lama neih tura ruahman a ni.  

Meghalaya autumn session chu November 5 -12 chhungin neih a ni dawn. 

Session-ah hian rorel inkhawm ni nga chauh an nei dawn a, ni hnih chu Private Members business atan dah niin, ni thum chu sorkar kaihhnawih thil ngaihtuahna atan dah a ni. Session neih kar lakah hian holiday ni thum, Inrinni leh Pathianni bakah state holiday a tla dawn a ni.