Manipur : Minister in kawtah hmeichhe pawl lungawi lo pung khawm

Manipur sorkar leh sorkar laipuiin an state buaina a hmachhawn danah lungawi loin, Meitei pawl Coordinating Committee on Manipur Integrity (COCOMI) women's wing chu Information and Public Relations (IPR) minister, Dr. Sapam Ranjan Singh chenna hmun Lamphel, Imphal West district-ah an pung khawm.

Minister in kawta lungawi lo pung khawmte hian state sorkar leh sorkar laipuiin Manipur buaina chinfel a nih theih nana hma an lakna chu beitham an ti a, buaina a reh theih nan theihtawp an chhuah loah an ngai. COCOMI women's wing chuan buaina chhuah ṭan tirha buai ve lo, thla 13 chhung zet ralmuang taka awm Jiribam district-a buaina chhuak chungchang pawh an sawilang a, hun liam taa Churachandpur, Moreh leh Kangpokpi-a buaina chhuak veng tura sorkarin hma a la ṭha tawk lo ang bawkin Jiribam-ah pawh hian buaina chhuak veng tur hian hma an la ṭha tawk lo tih an sawi.

Manipur sorkar chu state chhunga buaina a reh theih nan thutlukna siam harsa tak pawh siam ngam tura an duh thu tarlangin, ruihhlo tawlh ru ṭhinte hnawh bo an nih theih nan rorelna khawng taka kalpui turin sorkar chu an phut bawk. MLA leh minister-te chu Jiribam tlawha an dinhmun a hmun ngeia en chiang tura an phut thu sawiin politician mahni ram venghim zo lo chu an hna chawlhsan ngam tur turin an ti.

COCOMI hmeichhe pawl chuan ruihhlo tawlh ru ṭhin chungchanga an thil phut tihhlawhtlin a nih loh chuan lungawi lohna an lantir chhunzawm zel dawn tih an puang. Lungawi lo pung khawmte thil phut chu zau zawka sawi ho a nih tur thu IPR Minister Dr. Sapam Ranjan Singh chuan sawiin, state sorkar chuan buaina a reh thuai theih nan hma a la reng tih a sawi bawk.

Myanmar mi 38 thawn kir

Manipur sorkar chuan India rama dan loa rawn lut Myanmar mi 38 chu Thawhlehni khan an ram lamah a thawn kir. Myanmar mi dan loa lo lutte hi Moreh aṭanga rawn lut niin an zinga 21 chu mipa niin hmeichhia 11 leh naupang paruk an awm bawk. India lam thuneitute chuan Indo-Myanmar friendship gate, Moreh-ah Myanmar lam thuneitute hnenah dan loa lutte hi an hlan a ni.