District council chak zawk neih nan direct funding leh anti-defection law neih a ngai : Debbarma

Tripura-a tualṭo party, Tipra Motha chairman hlui Pradyot Kishore Manikya Debbarma chuan 6th schedule hnuaia district council zawng zawngte chu sorkar laipui hnena direct funding nawr turin a sawm.

Debbarma hian district council te chuan a huhoin 125th amendment, direct funding inziahna hmang turin sorkar laipui nawr se a duh tih a sawi a, an hlawhtling a nih chuan district council chak zawk leh mahni kea ding thei an nei thei dawn a ni, a ti. "Direct funding leh anti-defection law kan neih theih chuan council chu a chak leh zual ang," Debbarma chuan a ti.

Sorkar laipuia home ministry chuan Tipra Motha leh sorkar laipui inremna, Tiprasa accord chungchangah thuthar an nei tih sawiin he inbiaknaah hian tlawmngai pawl, zirlai, mithiam leh traditional council an telve hun a nghakhlel tawh hle a, an ngaihdan leh thurawnte an ngaihthlaksak dawn tih a sawi.