Arunachal sorkar thar vawiinah lak luh a ni dawn

Arunachal Pradesh state assembly inthlan neih zawh takah Bharatiya Janata Party (BJP) chuan hnehna changin vawiin hian sorkar thar lak luh a ni ang. Arunachal-ah hian BJP hian a zawnin term thum sorkarna an siam dawn ta a ni.

Arunachal-a assembly bial 60 awmah BJP hian bial 46-ah hnehna changin, party mala sorkarna siam turin MLA an ngah tawk a ni. Arunachal chief minister leh council of minister lakluhna inkhawm hi Dorjee Khandu Convention Centre, Indira Gandhi Park, Itanangar-ah neih a ni dawn a, nimin tlai khan BJP legislature leader atan Pema Khandu chu thlan nawn leh a ni bawk.

BJP state president Biyuram Wahge chuan sorkar thar lak luh leh thutiam lakna hun hi union home minister Amit Shah, union minister for health JP Nadda, leh BJP national general secretary BL Santosh te chuan an telpui dawn tih a puang. Hemi bakah hian mi pawimawh tak tak Tarun Chugh, MP Ravi Shankar Prasad, union minister Kiren Rijiju leh Assam minister Ashok Singhal te chu sorkar lakluh inkhawmah hian an tel bawk ang. Sorkar laipuia mi pawimawh tak tak an tel dawn avangin venhimna pawh tihkhauh a ni.