BSF-in bawng tawlhruk tum 1,348 man tawh
Border Security Force (BSF) Meghalaya Frontier-a duty te chuan kumin chhungin Indo-Bangla border-ah bawng tawlhruk tum 1,348 an man. An bawng man hlut zawng hi cheng vaibelchhe hnih chuang a tling a ni.
BSF chuan bawng leh thil dang tawlhruk ṭhin vengin Meghalaya-a Bangladesh ramri, international border chu uluk taka ven a ni tih an sawi. January 17-18 zing khan BSF sipaite hian East Jaintia Hills leh West Jaintia Hills district aṭanga Bangladesh-a tawlhluh tum, bawng 277 an man leh a ni. Hemi hma hian ṭum eng emaw zat an lo man tawh bawk.
BSF chuan kum 2019 aṭang khan ramri kaltlanga bawng tawlhruk hi a hluar chho hle nia sawiin, kuminah pawh a la ziaawm lo tih an sawi. Bawngte hi Assam aṭanga rawn phurin, Meghalaya kaltlang hian Bangladesh ramah tawlhluh an tum ṭhin a ni. Bawngte hi ramhnuaiah dahin, ramri hung loh lai aṭanga Bangladesh luhpui dan remchang an zawng ṭhin. BSF pawh hian bawng tawlhruk tumte thiltih hi ṭum tam tak an lo dang tawh a ni.
Tura aṭanga Bangladesh rama bawng tawlhru tute chuan tualchhung thuneitute hnen aṭangin 'No Objection Certificate' an nei fo ṭhin niin BSF chuan a sawi a, hemi chungchang hi enfiah turin state thuneitute hnenah pawh an ngen nghal bawk.