Manipur : Kuki Inpi-in raltlan tana housing scheme duan pawm lo

Manipur sorkarin raltlan tana housing scheme a duan, Guidelines for Permanent Housing Scheme for Displaced Persons chu Kuki pawl, Kuki Inpi chuan an pawm thei lo tih an sawi. He scheme hi Kuki-Zo hnam tan a ṭha lo niin an sawi a, June 11, 2024-a emergency meeting an neihah housing scheme an duh lohna resolution hi an pawm a ni.

Kuki Inpi chuan raltlante tana sorkarin housing scheme a duan chu Kuki-Zo hnam mamawh dan nen a inmil lo an ti a, Kuki-Zo hnam zinga raltlante hnenah an ṭanna hi an hrilh hre tawh tih sawiin Manipur sorkar rawtna pawm lo turin Kuki-Zo raltlante chu an chah tih an sawi bawk. Kuki-Zo hnamte chu state sorkar chuan tiduhdahin en hrang mah se an hnam tan Kuki Inpi chu an ding zel dawn tih an sawi.

An buaina chinfel a nih hma chu rawtna dang emaw hmalakna dangah emaw Kuki-Zo hnamte chu lungawi mai lo turin an chah a, an hnam dikna chanvo an neih let hma chu beidawng lo turin mipuite chu an ngen a ni. Kuki Inpi chuan hun harsa tak an tawh lai pawha anmahni thlawp tlattu, Kuki-Zo hnam chungah lawmthu an sawi bawk. An harsatna chu an la paltlang ngei an beisei a, chumi tur chuan inpumkhatna neih a ngaih bakah chunglam puihna a ngai tel tiin, "Kan mipuite zalen nan a tawp thlengin kan bei ang," an ti a ni.