Meghalaya : ILP neih theih nan sorkar laipui nawr dawn

Meghalaya sorkar chuan state chhunga Inner Line Permit (ILP) system hman a nih ve theih nan sorkar laipui a nawr dawn tih Meghalaya deputy chief minister Prestone Tynsong chuan a sawi. Hemi bakah hian Khasi leh Garo ṭawng 8th schedule hnuaia telh a nih theih nan hma an la dawn bawk.

Dy CM Tynsong chuan Chief Minister nen Delhi-ah an zin dawn tih sawiin prime minister, home minister leh hotu pawimawhte an hmu dawn tih a tarlang. He hunah hian Meghalaya tana pawimawh hrang hrang an hotute hnenah an thlen dawn a, heng zingah hian ILP leh 8th schedule a Khasi leh Garo ṭawng telh chungchang pawh a tel a ni, a ti.

Tura Congress MP, Saleng A Sangma-a'n MP hluiin Parliament-ah ILP chungchang a sawi lang ngai lo tia a puhna chu Tynsong chuan chhangin, an party National People’s Party (NPP) chuan Rajya Sabha leh Lok Sabha-a an MP-te chu ILP chungchang sorkar laipui sawipui turin an chah ṭhin tih a sawi. Parliament chhungah a ni emaw sorkar office-ah emaw pawh nise Meghalaya tana ILP leh ṭawng chungchang sawi ṭhin turin an MP-te chu an chah tih a sawi.