Sikkim : CM nupui MLA a nihna aṭangin a bang leh nghal

Sikkim chief minister Prem Singh Tamang nupui, Krishna Kumari Rai chu thlantlin a nihna Namchi-Singithang Constituency aiawha Member of Legislative Assembly (MLA) a nihna chawlhsan leh nghal.

Kumari hian MLA nihna a chawlhsan thu hi dan siamtu ni tura rinawmna thuthiam a lak tukah a puang a ni. Sikkim State Legislative Assembly speaker, MN Sherpa chuan Kumari banna theh luh hi a pawm tawh a, thlan tlin a nihna bialah hian by-election neih ngai dawn mah se engtik niah nge neih a ni ang tih erawh hriat a la ni lo thung.

Sikkim CM nupui hi assembly inthlan khan Namchi-Singithang bial aṭang hian hneh taka thlan tlin niin amah hnaih bertu Sikkim Democratic Front (SDF) candidate aiin vote 5,302 in a hmu tam zawk a ni. Kumari pasal leh Sikkim CM ni bawk, Prem Singh Tamang chuan MLA aṭanga a nupui a ban chhan chu an party, Sikkim Krantikari Morcha (SKM) in a ṭha zawk tura a ngaih vanga a ni tih a sawi. CM Tamang chuan Namchi-Singithang bial mipuite chu MLA dang ṭha leh bial tana thawh hlawk tur midang an nei dawn tih hrilhin, bial mipuite chu lunghnur mai lo tur leh an party SKM leh amah chu ringtawk turin a chah bawk.

Sikkim CM-in Soreng-Chakung bial a chhuahsan

Sikkim CM, Prem Singh Tamang pawhin Soreng-Chakung bial MLA a nihna aṭangin a inhnukdawk tih a puang. Tamang chuan Soreng-Chakung bial mipuite chungah lawmthu a sawi a, a seilenna leh a nu chenna bial a nih vangin Soreng-Chakung bial tan theihtawp an chhuah zel dawn tih a sawi. Sikkim mipuite chu hmalam panpuiah a sawm a, Sikkim ram hausa leh changtlung zawk an din theih nana ṭanrualpuiah mipuite chu a sawm a ni.

Tamang hi assembly inthlan-ah khan bial hnih aṭanga thlan tlin a ni a, Soreng-Chakung leh Rhenock bialah Tamang hi tling mah se Conduct of Election Rules 1961, hnuaia Section 67/A in a phut angin inthlan result puan a nih hnu ni 14 chhungin bial pakhat zawk a chhuahsan a ngai a ni. Vawiin hi huntiam ral ni a nih angin nimin khan Soreng-Chakung bial hi a chhuahsan dawn tih a puang a ni.

Chief Minister-in a bial pakhat zawk a chhuahsan avang leh, a nupui MLA a nihna aṭanga a chawlh nghal avangin Sikkim assembly bial pahnihah inthlan ṭhat a ngai dawn a ni. Assembly inthlan neih zawh takah khan Prem Singh Tamang kaihhruai Sikkim Krantikari Morcha (SKM) chu hneh taka thlan tlin niin constituency 32 awmah bial 31-ah hnehna an chang a ni. MLA pahnih an chawlh tak avangin SKM hian MLA 29 nei lailawk mah se by-election neih turah hian hnehna an chan leh ngei rin a ni.