Tripura : Holland leh Dubai-ah lakhuihthei thawn chhuak dawn

Tripura sorkar chuan lakhuihthei, Queen pineapple an tih chu Holland-ah metric ton 30 leh Dubai-ah metric ton 5 an thawn chhuak dawn. Queen pineapple hian North Eastern Regional Agricultural Marketing Corporation (NERAMAC) hmalakna zarah geographical indication (GI) tag a hmu tawh a ni.

Tripura agriculture minister Ratan Lal Nath chuan Ningani khan Oman a thawn tur lakhuihthei kg 600 a vai liamnaa thu a sawiah, Holland leh Dubai lama an thawn leh tur thu hi a sawi a ni. Agriculture minister chuan NERAMAC, SIMPET leh State sorkar ṭanrualna vangin Tripura thar chhuah queen pineapple chu Oman a thawn chhuah a ni tih a sawi.

Ratan Lal Nath chuan Oman lama an thawn tur lakhuihthei chu Guwahati lam panpui niin heta ṭang hian Oman lamah thlawhtheihna hmanga phurh thlak tur a ni tih a sawi. Dubai lamah metric ton 5 thawn chhuak tura inremna an neih tawh thu leh, Holland lamah metric ton 30 vel thawn turin inbiakna a kal mek thu a sawi bawk. Queen Pineapple hi sorkarna an chan hnuah rampawn- Dubai, Qatar leh Bangladesh-ahte an thawn chhuak tawh tih a tarlang.

Tripura Agriculture Minister chuan kum 2018 hnu lamah state chhungah lakhuihthei chinna hmun a pung chak hle tih a sawi a, kum nga chhungin metric ton 33 rampawna an thawn chhuah bakah India ram chhungah metric ton 12,500 hralh chhuah a ni, a ti. Heng thilah hian loneitute chu a hlawkna teltu an ni a, lakhuihthei hi bazar rate-ah pum khat Rs 18 ni mah se pum khat Rs 32 huin loneituten an hralh thei tih Nath chuan a sawi. Lakhuihthei bakah thlai dang- lamkhuang (4.4 MT), wood apple (257 MT), tengtere (397 MT), sawhthing (74 MT) leh panhnah (70 MT), Tripura chhunga tharte chu rampawn leh India ram hmun dangah an thawn chhuak tih Minister chuan a sawi bawk.