Arunachal-a Cancer Institute din nan Rs vbc 217.19 pe

Ministry of Development of North Eastern Region (MDoNER) chuan State Cancer Institute din nan Arunachal Pradesh chu Rs vbc 217.19 hman a phalsak. Cancer Institute hi Midpu, Doimukh, ICR hmunah din a ni ang.

Arunachal chief minister Pema Khandu chuan DoNER ministry hnenah lawmthu sawiin, Arunachal-a cancer natna veite enkawl nana sum tam tak an theh chhuak thei chu lawmawm a tih thu a sawi. CM Khandu chuan Cancer Institute hawn a nih hunah chuan cancer natna vanga hmun hla zawk pan ṭhinte chuan state chhungah ngei enkawlna an dawng thei tawh dawn a ni tiin, state mipuite chu cancer dona kawnga hma lak puiah CM chuan a sawm nghal bawk.

DoNER ministry sum pek hmang hian khum 76 awmna cancer treatment centre din a ni ang. Cancer damdawi-in din a nih theih nan hian Dr B Borooah Cancer Institute, Guwahati, Assam leh Tata Memorial Centre, Mumbai te chuan Arunachal sorkar hi an pui dawn a ni. Sorkar laipui chuan Arunachal chhung ngeia cancer enkawlna changtlung zawk neih leh, a mi chengte'n he natna enkawlna in an hnaih hi a duh a ni.