Meghalaya : Reservation siam dan turah pawl hrang hrangin rawtna thlen

Meghalaya sorkar-in state chhunga hna lak chungchanga reservation siam dan ennawn turin expert committee a din hnuah, state chhungah titi a titam hle a, pawl hrang hrang chuan reservation siam dan tura an duhdan sawiin, rawtna an thlen.

Meghalaya-a a tribal ni lo, ram leilung fa anga chhiar ni tho Muslim, Hindu, Bihari, Nepali leh a dangte (Indigenous Non-Tribal Community) chuan reservation siam thar a nih chuan telh ve an duh tih a sawi. GHADC MDC Sofior Rahman chuan heng tribal ni lo ram leilung fa anga chhiar ni si, telh tura an duh thu hi reservation quota ennawn tura ruat, expert committee hnenah a thlen tawh tih a sawi.

State chhunga eptu party lian, Voice of the People Party (VPP) chuan hna lak atana reservation siam chu kum 1971 census behchhana siam ṭha an ti. VPP hian Khasi leh Jaintia chu hnam khat anga chhiar an ngai tih an tarlanga, VPP president Ardent Miller Basaiawmoit chuan tuna Meghalaya reservation policy hman mek chu sawiselin hnam hrang hrang mipui zat aṭanga an chanpual dah hran chu reservation policy an hman mek chuan a tarlang ṭha tawk lo a ni, a ti.

Hynniewtrep Youth Council (HYC) chuan reservation policy siam ṭhat a nih dawn chuan Meghalaya chhunga Schedule Tribe (ST) tan 93% dah hran an duh tih an sawi bawk. HYC president Roykupar Synrem chuan an duhdan hi expert committee hnenah a thlen tawh a Khasi-Jaintia tan 50%, Garo tan 40% leh tribal dangte tan 3% anga an duh thu a tarlang. Hemi bakah hian reservation kaihhnawih thil dang hrang hrang siam ṭha tura an duhte an tarlang tel bawk.

All India Garo Union (AIGU) chuan expert committee hnenah memorandum theh lutin, tuna reservation policy an hman mek tihdanglam a nih chuan state chhungah intual vuakna a chhuah mai a hlauhawm tih an sawi. Meghalaya chhunga reservation policy hman mekah 40% Khasi-Jaintia, 40% Garo, 5% tribal dangte tan dah hran niin a bak 15% erawh tu tan pawha chuh theih tura dah a ni. AIGU chuan Khasi-Jaintia leh Garo hnamte'n reservation 40% ve ve an neih mek chu tihdanglam a ṭha lo tih tarlangin, Garo hnamte chu hmasawnna kawngah an la hnufual bik avangin tuna an reservation quota neih khawih danglam chu thil tihchi a ni lo a ni, tiin an sawi.