Manipur : Bungraw phur lirthei pahnih hal a ni

Manipur police chuan Imphal aṭanga Churachandpur pan tur truck pahnih chu Inrinni tlai dar 3 khan Tronglaobi khuaah hal a ni tih an sawi. Lirthei liante hian lei (bridge) siamna tur iron rod an phur a ni.

Bungraw phur lirthei pali chu Tronglaobi khaw miten an lo tiding a, heng zinga pahnih chu an hal ta a ni. Manipur police chuan a hmun an thlen hnuah mipui thinrim hnawh darh nan tear gas leh mock bombs an hman a ngai hial a ni. Heng lirthei an hal takte hi state pawn lam mi ta a ni a, Churachandpur-a bungraw dah tura tirh luh an ni. Police chuan Tronglaobi khua leh a chhehvelah boruak sang hle mah se buaina liantham a chhuah a hlauhawm hrih lo tih an tarlang.

Truck an hal leh tihdinte hian National Highway 102-B Churachandpur-Tuivai kawnga lei (bridge) siamna tur bungrua chu Sekmai aṭangin an phur a, Churachandpur lam panpui an tum a ni. Tronglaobi khuaa phar din niin khawi lamah nge an kal dawn tih zawh an nih hnuah, Churachandpur lama kal tur an ni tih mipuiten an hriat hnuin truck pakhat chu mipuiten an hal a, a dang pakhat a kangkai ta a ni. Manipur police leh central force-te chu a hmunah rang taka thlengin buaina lian zawk thleng lo turin mipui an hnawt darh thei a ni.