Tripura leh Sikkim ruah sur nasa vangin buai

Hmarchhak state pahnih, Tripura leh Sikkim chuan ruah sur nasa vangin harsatna an tawk. Tripura-ah hian Inrinni zing khan ruah nasa taka surin National Highway (NH) Mile 35 ah leimin thlengin lirthei chevel a tibuai hle. Sikkim-ah pawh National Highway 10-ah leimin vangin kawng a ping bawk.

Tripura-a kawngpui ping hi Public Works Department leh NH Division-in an ngaihsak lawk loh vangin mipui an lungawi lo hle a, kawng titlang tura hmalakna a chak loh vangin kawngah mi tam tak an tangkhang a ni. Mile 35 NH bakah hian Tripura chhunga mi vek, Mile 44 National Highway chu a min bawk a, kawng pin phah lo mah se lirthei veivak tan harsatna a siam thung.

NH 10 a pin avang hian Sikkim sorkar chuan khualzin tangkhangte chu thlawhtheihna hmanga hruai chhuah tum mah se khaw awmdan in a zir loh vangin Chungthang Gurudwara-ah khualzinte hi dah lailawk an la ni. Sikkim Travel Agents Association chuan travel agency zawng zawng, a bikin North Sikkim lama an khualzin hruai tangkhang mekte chu vawiin zing dar 10 hmain Mangan thleng turin an hriattir a, khualzinte hruai kir dan tur an ruahman a ni.