Arunachal : CM-in ni 100 chhunga sorkar hmalakna tur a puang

Arunachal Pradesh chief minister Pema Khandu chuan a kaihhruai sorkar tharin ni 100 chhunga an hmalakna tur Inrinni khan a puang. Khandu chuan ni 100 chhunga an thil tihhlawhtlin tum an sawi fel tawh thu leh, an sorkar chhunga tihtur pawimawh 24 an thlan chhuah thu a sawi.

Pema Khandu chuan sorkar hmalakna chu inthlan laia an manifesto zulzui tur a nih thu a sawi a, an manifesto tihlawhtling turin hma an la dawn a ni, a ti. Khandu chuan tihtur pawimawh 24 chu hmasawnna thlen thei thil hrang hrang a huam dawn a, heng zinga a pawimawh ber chu zirna lam a ni tih a sawi bawk.

Arunachal CM chuan loneitu, hmeichhia leh ṭhalaite tan hmalak an tum tih sawiin, "Ni 100 chhung tihtur kan intuk tawh a, hetah hian ṭhalai, loneitu leh hemichhiate tana hmalakna tur pawh a tel ang" a ti. Pema Khandu hi a ṭum thum nan Arunachal chief minister atan kar liam ta Ningani khan lak luh a ni a, assembly inthlan neih laia an thutiam hlen a tum tih sawiin hemi tihlawhtling tur hian kum nga lai an la nei tih a sawi.