Assam : Minister leh sorkar official-ten eng chhit man pe tawh dawn

Assam sorkar chuan July 1 aṭangin state chhunga minister leh sorkar official-te chuan an eng chhit man an pek ve a ngai tawh dawn tih a puang. Hetianga an tih chhan hi 'VIP culture' tih bo an duh vang a ni tih Assam chief minister Himanta Biswa Sarma chuan a sawi.

Chief Minister chuan, "Mipui chhiah tlingkhawm aṭanga sorkar hnathawkte eng chhit man pek a ni ṭhin hi kan titawp dawn a ni," tiin amah leh Assam chief secretary chuan hma an hruai anga, July 1 aṭangin an eng chhit man an pe tawh dawn tih a sawi. Assam chhunga sorkar hnathawk zawng zawng chuan July 2024 aṭangin an eng chhit man an pe ve bawk ang, a ti. Hetiang a nih tak avang hian quarters-a khawsa, minister leh sorkar hnathawkte eng chhit man mipui chhiah aṭanga pek ni ṭhin chu tihtawp a ni dawn ta a ni.

Assam sorkar thutlukna hi mawhphurhna la ngam tura minister leh official-te duhna vang a nih bakah, mipui chhiah tlingkhawm hlutna an hriatfiah zual theih nana tih a ni. CM Sarma chuan eng renchem nan sorkar chuan hma a la tih sawiin chief minister secretariat, home department leh finance department ni lo sorkar office dang zawng zawngah zan dar 8 hnu lama electrict auto-disconnect thei turin hma an la mek a, sorkar school leh office 8,000 chuangah hman a ni tawh bawk niin a sawi.

Solar hmang veka eng pek chhuahna hmasa ber Assam Secretariat

Assam Secretariat chu India rama state sorkar hmunpui zingah nî zung chakna, solar hmang veka eng pek chhuahna secretariat hmasa ber a ni. Assam sorkar chuan June 16, Pathianni khan Assam secretariat-a hman tur 2.5 MW solar power project chu an hawng a ni.

Chief Minister Sarma chuan nî zung chakna hmanga eng chhit theihna tur siam nan hian Rs vbc 12.5 an seng tih sawiin, hei hian thla tin eng chhit man a kal ral Rs nuai 30 a hum tir thei dawn tih a sawi. CM chuan boruak bawlhhlawh pe chhuak lo (Net-Zero) sorkar nih an tumna kawngah nasa takin hma an sawn a tih sawiin, "Assam Green Secretariat chu India ram Green Secretariat hmasa ber a ni" a ti.

Assam secretariat-a eng pek chhuah zawng zawng hi nî zung chakna hmang a ni tawh dawn a, hei hian sorkar sum tam tak a hum thei dawn a ni. Sarma chuan sorkar hmunhma zawng zawngah solar panel dah vek an tum tih sawiin medical college leh university-ahte bul ṭan a ni ang, a ti. Assam CM chuan mipuite tan April 1, 2025 aṭangin power tariff Re 1 a tihhniam dan kawng Assam Power Distribution Company Ltd (APDCL) in an dap dawn tih a sawi bawk.