Naga pawl hrang hrangin dan loa lut Myanmar mi thawn kir an duh

Manipur leh Nagaland-a Naga pawl hrang hrang chuan India ram chhunga dan loa rawn lut, Myanmar khua leh tuite chu an ram lamah thawn kir leh nise an duh tih an tarlang. Naga tlawmngai pawlte hian union home minister Amit Shah hnenah memorandum theh lutin, heng Myanmar mite hi an ram lama thawn let turin an ngen.

Memorandum theh luttu Naga pawl hrang hrangte chu- United Naga Council (UNC), Naga Women’s Union (NWU), All Naga Students Association Manipur (ANSAM) leh Naga People’s Movement for Human Rights (NPM-HR) te an ni. Naga tlawmngai pawlte hian Myanmar aṭanga dan loa rawn lut mi 5,457 chuan Tangkhul Naga khaw pariatah awm hmun khuar mekin, helaia cheng sa aiin an tam tawh zawk tih an sawi.

Khawtlang duh loh thil titute hrem turin dan kengkawhtu an awm lo a, helai hnam ziarang leh chindan phung chu ramdang hnamzia in a rawn pawlh dal tawh a ni tih memorandum-ah chuan an tarlang. Raltlante chu awmna sawn reng an nih vangin an chet dan thilthlai a har thu leh, Myanmar dinhmun pawh a ziaawm leh tak avangin him taka an ram lama thawn let turin an duh thu memorandum-ah hian an tarlang.

Myanmar aṭanga raltlan chungchang bakah hian pawl hrang hrangte chuan Naga awmna hmun aṭanga Assam Rifles hnuk kir turin sorkar laipui chu an ngen bawk a, kum 1997 ah Indo-Naga Ceasefire Agreement ziak mahse tunhnaiah sipai chetna a tam leh tawh avangin sorkar laipui chu hlauhawm lian tham a thleng dawna a hria a nih loh chuan a sipaite la chhuak turin an ngen a ni.