Sikkim : Minister-in khualzin tang mek him taka chhan chhuah a tiam

Sikkim Roads & Bridges Department minister NB Dahal chuan leimin avanga khualzin tang mekte chu him tak leh rang takin chhan chhuah a tiam.

Sikkim hmar lamah ruah sur nasa in a thlen leimin vangin kawngpui tam tak a ping a, Lachung khuaah khualzin 1,200 chuang an tang mek a, heng zinga 15 chu ramdang mi an ni. Minister Dahal hi leiminna hmunah kalin, khualzin tangte harsatna tawh a ngaihthlaksak a ni.

Border Roads Organisation (BRO) chuan North Sikkim kalpawhna kawng a tlang thuai theih nan kawnga lei tlate thianin hma an la reng a ni. BRO hian an khawl neih ṭhat ber ber leh thawktu tam tak chu hmun hrang hranga leimin thian fai turin an tir a, mahse ruah sur nasa avangin hna thawh a chak theih lo thung.

Mangan district, Sikkim kalpawhna kawngpui chu leiminin kawng a hnawl avangin district chhung kalpawh theih lohin a awm mek bawk. Sikkim-ah hian June 11 aṭang khan ruah nasa takin a sur ṭan a, ruah sur tam vangin hmun hrang hrangah leimin, sabereka-khuang-kaih leh lui lian a thleng a ni. Heng khuarel chhiatna hrang hrang vang hian thi leh hliam an awm bakah mi tam takin an chenna hmun an chhuahsan a ngaih phah bawk.