Manipur sorkar-in sorkar laipui dawr remti

Bill tihkhawtlai chungchanga hun rei tak chhung Manipur-a pawl hrang hrang ten sorkar kar nana lungawi lohna an lan tir mekah, state sorkar chuan hma a lakpui tur thu a puang ve ta. Thawhṭanni tlai khan he mi chungchang ngaihtuah hian Chief Minister Secretariat-ah emergency Cabinet meeting neih a ni. Manipur Assembly-in bill pathum a lo pass tawh tun thlenga tih khawtlai a nih chungchangah hian Manipura political party zawng zawng aiawh te chuan June 3 hian sorkar laipui dawr tura New Delhi an pan chu cabinet meeting chuan a remti ta a ni.

Sorkar thupuangtu leh Rural Development & Panchayati Raj Minister ni bawk M Okendro chuan, Bill pathum tihkhawtlai a nih avanga state chhunga pawl hrang hrang te lungawi lohna an lantir chungchang chu ngun taka ngaihtuah a ni a, state sorkar chuan Bill pass tawh dan anga hman a nih thuai theih nan hian hmalakpui a remti ta a ni, a ti. June 3 hian party hrang hrang aiawh te chuan sorkar laipui dawr tura New Delhi an pan tur thu sawiin, Manipur Assembly-in Bill pathum a pass tawh tun thlenga president-in a la pawmpui loh chuchang chu India president Pranab Mukherjee, Prime Minister Nerendra Modi leh Home Minister Rajnath Singh te sawipui an tum thu a sawi.

Nikum August 30 khan Manipur Assembly chuan Bill pathum - The Protection of Manipur People Bill, 2015; The Manipur Land Revenue & Land Reforms (Seventh Amendment) Bill, 2015 and The Manipur Shops & Establishments (Seventh Amendment) Bill, 2015 te a pass. Heng Bill pathum te hi president pawmpui tura thawn a ni a, mahse president chuan tun thlengin he Bill hi a la pawmpui lo. President-in hun rei tak chhung a tihkhawtlai avang hian Manipur-a pawl hrang hrang, a bikin tribal te chuan kawng hrang hrangin lungawi lohna an lan tir a, nunna chan pawh mi eng emaw zat an awm tawh.

Tribal te chuan bill tih khaw-tlai a ni chu an hriat thiam loh thu vawi tam tak an au chhuahpui tawh a, state sorkar chu hma la turin a ngen chamchi bawk. Mahse state sorkar chuan hma a lakpui mai loh avangin buaina hi a punlun chho zel a, political party ṭhenkhat chuan Congress kaihhruai Manipur sorkar chu an dem thu an sawi ve bawk. Tribal te lungawi lohna lantir hian thlawp a hlawh hle ṭhin a, a hmei a pain sorkar kar nan an theih ang angin an che chhuak ṭhin a ni.

Tunhnaiah pawl hrang hrang bakah zirlai te chuan lungawi lohna lantir chu an thlawp thu sawiin, kawngzawh an huaihawt nghe nghe. Zirlai kawng zawh te chuan chief minister office an pan a, police ten lo dangin an innawrbuai zui a, hliam eng emaw zat an awm. Zirlaite chuan thuchhuah siamin an thil phut a hlawhtling lo a nih chuan sorkar laipui kar nan New Delhi-ah kawng zawh hi buatsaih leh an tum thu an sawi bawk. Hetih lai hian state sorkar chuan nawrna nasa tak avang hian emergency cabinet meeting an nei a, sorkar laipui dawr tura New Delhi pan an remti ta a ni.

Hemi chungchangah hian May 9 khan political party hrang hrang aiawh leh Joint Committee on Inner Line Permit System (JCILPS) te chuan meeting an lo nei tawh a ni. Meeting-ah hian Bill chu Act a nih thuai theih nana sorkar laipui dawr dan turte sawiho a ni a, memorandum thehluh an remti bawk.