Nyishi Elite Society ten AP CM ngaihdam dil turin phût

Nyishi Elite Society (NES) president Bengia Tolum chuan Thawhṭanni khan Arunachal Pradesh Chief Minister Kalikho Pul chu Nabam Tuki nen an inbiakna nia ngaih audio clip chungchangah ngaihdam dil turin an ngen tih a sawi.

Chief Minister Kalikho Pul chuan he audio clip hi mimal intih hmingchhiat tumna mai a ni a ti a, thudik pakhatmah a awm loh thu leh, amah tihchiat tumtute thil tih a nih thu a sawi. Pul hi Nyishi mite hmusit zawnga thusawi leh BJP zawm tura sawmna pawm leh sum dawng hnen aṭanga thamna la angin he clip-ah hian tih chhuah a ni.

He audio clip hi nikum December thlaa darh kha a ni a, darkar khat leh minute 55 zeta rei a ni nghe nghe. He inbiakna-a mipa aw chu mi ṭhenkhat chuan Pul niloin midang a ni an ti a, nimahsela Tolum chuan tuna an chief minister ni lai mek Kalikho Pul ngei a nih thu a sawi ve thung. NES president chuan, "Pul hian mipui hmaah ngaihdam a dil lo a nih chuan thu dik a zepah kan ngai a, thu dik hriat kawngah harsatna a siam thei a ni" a ti. He mi chungcahng hi chhui chian a, mipui hnena thudik puan a nih hma loh chuan Nyishi Elite Society (NES) chuan a bei zel dawn tih president Bengia Tolumu chuan a sawi. He inbiaknaa inhnamhnawih te chu man an phut thu leh chu chuan thu dik hriat kawngah nasa takin a puih theih tur thu a sawi bawk. He inbiaknaah hian sumdawng Vinodesh Bansal chu a inrawlh ve ngei niin phone number leh email address aṭangin a lang niin a tarlang bawk.

He mi chungchangah hian May 25 khan Likha Maj chuan Pul-a chuan he thilah hian thiam lohna neilo niin conference-ah a sawi. Mahse hei hi NES chuan an pawm lo tih sawiin, Likha Maj hian a mimal ham-
ṭhatna baka a ngaihtuah lo a ni an ti. Seppa kangmei tuarte tana Likha Maj'n cheng nuai nga a pek te chu mipui hmin tumna mai a ni an ti a, mimal hming-
ṭhatna bak a ngaihtuah lo a ni an ti bawk. Nyishi Elite Society (NES) president Bengia Tolum chuan an duh ber chu he inbiakna chungchanga mipuite hnena thu dik hriattir a ni a ti a, Pul chu mipui hnenah ngaihdam dil tura an phut thu a sawi bawk a ni.