Assam Assembly session ṭan Speaker atan Indian Information Service officer hlui thlang

Assam Assembly session vawi 14-na chu nimin aṭang khan ṭan a ni a, ni thum chhung a awh ang. Assam-ah hian Assembly member 126 an awm mek a ni.

Protem Speaker Phani Bhushan Choudhury chuan member tharte chu rinawmna thu tiam tirin session hi ṭan a ni. Rinawmna thu tiamnaah hian ṭawng chi sarih hman a ni a, member 11 te chuan Bodo ṭawng an hmang a, Bengali 13, English panga, Sanskrit pathum, Hindi pakhat leh Nepali ṭawng hmang pakhat te an ni a, a dang zawng hi chuan Assamese an hmang thung.

Member 126 zingah hian Actress aṭanga politician inlet ta Angoorlata Deka,, Batadroba aṭanga BJP MLA atana thlan tlin chuan Sanskrit ṭawngin thu a tiam a, Assam mo thawmhnaw cheina ang rawn inbelin, media lam ngaihven a hlawh hle. Gurujyoti Das chuan an traditional dress-a inthuamin House a lut a, thirsakawr hmanga House pan pawh an awm. Assam state-in kum 15 chhung zet Congress sorkar a hrawn hnua session neih leh hmasak berah hian member an kal ṭha hle. BJP chuan lal
ṭhuthleng changin, Congress MLA te chu opposition an ni ve dawn ta a ni.

Ranjit Kumar Das chu Assembly Speaker atan thlan a ni a, a ni hi Sarb-hog bial aṭangin ṭum hnih thlan tlin a nih tawh. Ranjit Kumar Das hi Indian Information Service officer hlui niin, Assam-a chanchinbu lar tak The Assam Tribune-ah correspondent hna a lo thawk tawh ṭhin bawk. Das hi kum 2011 Assembly elction-ah khan BJP ticket-in thlan tlin a lo ni tawh a, tun
ṭum elctionah khan a dinna ngai Sarbhog bial-ah bawk ding lehin, hneh taka thlan tlin leh a ni. Chief Minister Sarbananda Sonowal leh House-a senior member te chuan Das hi Speaker atan an lo hual lawk a ni. Sonowal chuan Das chu fakin politician ropui bik a ni a ti a, House member te chu Das an thlawp avngin lawmthu a sawi bawk.

Finance Minister Himanta Biswa Sarma pawhin Speaker Das chu fakin a thawhrimna leh a dawhtheihna te chu midang tana entawn tlak a ni a ti a, a mah thlang tlingtu Sarbhog bial mipuite chungah lawmthu a sawi bawk. Das-a chuan a hna chelh sang tak Indian Information Service chawlh sanin BJP party tan rinawm takin hunrei tak chhung a lo thawk tawh a ni, a ti. Parliamentary Affairs Minister Chandra Mohan Patowary pawhin Das chu Speaker hna chelh tura ṭha ber nia a hriat thu sawiin, House chu zahawm taka vawng turin duhsakna a hlan.

Assam Chief Minister hlui leh Congress MLA ni lai Tarun Gogoi pawhin Das chu fakin, state leh khawtlang tana mi ṭha a ni a ti a, a mahah hian entawn tur tam tak a awm a, a nun dan mawlmang tak zahawm tak si chu a ropuina belhchhahtu a ni, a ti ve bawk. Gogoi chuan an state chuan harsatna kawng hrang hrangah a tawk tih sawiin, he mi chingfel tur hian inpumkhat taka thawhho a ngai a ni a ti.

Congress Legislature Party leader Debabrata Saikia chuan Speaker thar chu mi ṭha a nih thu sawi ve bawkin, House-a thlei bik neiloa rualkhai taka member te enthiam turin a duh tih a sawi. Congress MLA Abdul Khaleque pawhin Ranjit Kumar Das chu Indian Information Service officer hna a chelh chhunga a thil tawn tam tak chu an state chuan journalism lamah hma nasa taka a sawn tir a rin thu a sawi.

Ranjit Kumar Das chuan House member te chungah lawmthu sawiin, "Speaker ni thei tura member te inlungrualna leh thlawpna ka hmuh hian min tilawm a ni", a ti. Member te chu ang khat veka a en tur thu sawiin, party induhsak bikna awm loin, state hmasawn nan theih tawp an chhuah tlang dawn a ni tiin speaker chuan member kalkhawm te chu a hrilh a ni.