Nagaland-ah Congress MLA pariat ban mai thei

Nagaland state Cong­ress thuchhuahin a tarlan dan chuan Congress MLA pariat te chu an nihna aṭangin ban an ni mai thei.

Congress party chhung­kaw buaina chuan ziaawm lam a pan thei rih lo niin a lang chho mek a, thla hmasa lawk khan Uttarakhand state-a Congress MLA pakua te chu an party-ah helin hnawhchhuah an ni nghe nghe. Hetiang thil hi kumin kum tir khan hmarchhak state Arunachal Pradesh-ah thleng tawhin, Uttarakhand leh Arunachal-ah te hian President's Rule puan ve ve a ni. Tun hnaiah boruak dang a rawn awm leh ta a, Nagaland-a Congress MLA panga te chu an party aṭanga chhuak mai thei dinhmunah an ding mek.

Nagaland state Congress chuan, heng MLA pariat te hian Feb­ruary 5, 2015 khan Zeliang-a kaihhruai sorkar chu an thlawp tih an lan tir a, mahse a hnuah Cong­ress sorkar lakah hian an hel nia hriat a ni. Hemi chungchang hi Salman Khurshid chuan Supreme Court-ah thlen a ni dawn tih a sawi a, disqualify an ni dawn leh dawn chu court thu tlukna a ni, a ti. Supreme Court chuan May 9 khan Uttarakhand-a Congress helte disqualify tura tih chu a lo hnawl tawh a, Harish Rawat sorkar fiah a nih ṭumah chuan vote an thlak ve phalsak an nilo thung.

Nagaland state Cong­ress chuan heng MLA pariat te hian speaker hnenah an nihna aṭanga ban turin an lo ngen tawh a, a chhanna erawh a la hriat loh. MLA pariat te hian rorel lai Naga People’s Front (NPF) an zawm nia hriat a ni a, Congress state unit chuan speaker hnen aṭangin hriattirna engmah an la dawng lo tih an sawi. Hetih lai hian speaker hian MLA pariat te ngenna hi a pawm tawh niin thu thang a awm bawk.

Kum 2013-a Congress ticket-a thhlan tlin MLa pariat te chu S.I. Jamir, Tokheho Yepthomi, C. Apok Jamir, S. Hukavi Zhimomi, Imtiwapang Aier, Imtikumzuk, Eshak Konyak leh Khekaho Assumi te an ni.