AP-ah Niti Aayog thlirletna hun neih a ni

Arunachal Pradesh state chuan Niti Aayog chungchang thlirletna meeting a buatsaih a, project kalpui mek te sawiho a ni bawk.

Niti Aayog CEO Amitabh Kant chuan state hmasawnna tura project kalpui mek te chu thla thum danah en nawn a, hna thawhte thlir let a ni ṭhin ang, a ti. Project tihkhawtlai awm mek te chingfel tura hmalak a ni ang tiin, state chief secretary chu project pending list thehlut turin a hriattir bawk. Kant bakah hian Niti Aayog team member 13 te chuan Nilainim khan Itanagar an thleng a, Chief Minister Kalikho Pul, Deputy Chief Minister Kameng Dolo leh sorkar mipawimawh dang te an titipui a ni.

Amitabh Kant chuan ram-ngaw-a hausa tak Himalayan state te chu Fourteenth Finance Commission hnuaiah cheng vaibelchhe 9,000 pek an ni, a ti. India ram state dangah project kalpui a nihin state sorkar leh sorkar laipui chuan senso zawng zawng 50:50-in an intum ṭhen ṭhin a, vannneih thlak takin Aruna-chal Pradesh bikah chuan sorkar laipuiin 90% tumin, state sorkar tum ve chu 10% chauh a ni a ti bawk. Sorkar laipui aṭanga project duan te chu ṭha taka kalpui a ṭul tih sawiin, chutianga hma la tur chuan a chah. Arunachal-ah hian sorkar ṭha leh langtlang a ding niin sorkar laipui chuan a hria a, kawng hrang hrangah hamṭhatna a ngaihtuahpui mek a ni tiin Kant chuan a sawi.