Imphal-ah hnamdang lakah curfew puan a ni IMC election-ah vote 82% a tla

Manipur hmun hrang hrangah curfew puan ni mah se Ningani-a Imphal Municipal Corporation (IMC) election neihah vote a tla ṭha hle a, vote tla zat hi 82% a tling phak a ni.

Yaiskul Assembly bial-a Moi-rang-khom Sougaijam Leirak-a Polling Station No 14/8-ah chuan vawiin hian inthlan ṭhat a ni dawn a, vote tla te hi June 6 hian chhiar a ni ang.

Ningani khan zing dar 8 aṭangin polling station hrang hrangah vote thlak ṭan a ni a, Imphal West -ah chuan vote tla hi 81.76% a ni a, hetih lai hian Imphal East-ah chuan 83.1% a tling phak thung. Election hi municipal ward 20-ah neih a ni a, tun ṭum hi Municipal Council aṭanga Municipal Corporation-a hlankai a nih hnua inthlan buatsaih a nih vawi khatna a ni.

Congress leh BJP te chuan ward 27 awmah candidate 26 ve ve an nei a, CPI (5), LJP (3), JD (U) (1) bakah independent candidate 25 zet an awm a ni. Ward pahnih-ah chuan chuhtu awmlo tlinga puan an ni a, candidate awm zawng zawng hi 127 niin, hmeichhe candidate 36 an awm a, seat kua chu hmeichhe tan reserved a ni.

Joint Committee on Inner Line Permit System (JCILPS) ten curfew an puan avangin venhimna khauh taka kalpui a ni a, mipuite chuan him takin vote an thlak thei a ni.

Hetih lai hian, Manipur state-in Inner Line Permit chhungchanga buaina a tawh mek chuan ziaawm lam ala pan thei meuh lo. Nilaini khan Joint Committee on Inner Line Permit System (JCILPS) te bultumin Imphal-a hnamdang te lakah curfew puan leh a ni.

Curfew puan a nih vang hian sumdawng leh nitin ei chhawp zawnga inhlawhfate chuan harsatna an tawk nasa hle a, Imphal-ah chuan Manipur ram leilung fa ni lo, hnamdang dawr zawng zawngte chu khar vek a ni. JCILPS ten darkar 24 awh curfew an puan avang hian Paona leh Thangal bazaar te chu khar zingah hian telin, Imphal leh a chhevela hnamdang cheng te chu pawn chhuak lo tura hriattir an ni.

He curfew puan hian Manipur ram leilung fate a huam tel loh vangin dawr inhawng leh lirthei che vel a buai phah lutuk lo nia hriat a ni. Mahse ṭumdang angin lir thei che vel hmuh tur a tam loh bakah, bazaar leh a velah mipui che vel hmuh tur an tam lo hle bawk. Hetih lai hian District transport service te chu tihtawp lailawk a ni a, state chhung hmun ṭhenkhatah kawngpui dan chah a ni bawk. ILP thlawptute chuan Chief Minister, Okram Ibobi Singh lim an hal a, buruak duhawm loh thleng erawh a awm lo. Kawng dungah lungawi lohna lantira ṭhu hmuh tur tam tak an awm a, thlawp a hlawh ṭha viau tih JCILPS te chuan an sawi.

Hetih lai hian June 1-3 chhung khan ‘public curfew’ puan a ni tho a, central leh state sorkar office zawng zawng te chu khar vek a ni. JCILPS te chuan sorkar hnathawkte chu vauin office kal lo turin an hriattir a, a bik takin state sorkar hnuaia thawkte chuan an zawm ṭha thawkhat hle a ni. Central sorkar office - BSNL, Post Office leh office lian dangte pawhin an zawm ṭha viau nia hriat a ni bawk.