Manipur : Amit Shah hoin buaina chungchang sawi

Union home minister Amit Shah hoin Thawhṭanni khan Manipur buaina chungchang sawi ho a ni. He meeting hi North Block-a ministry of home affairs office, New Delhi-ah neih niin sorkar laipuia mi pawimawh tak tak an tel a ni.

Amit Shah chuan union home ministry-in Kuki leh Meitei hnam chu inbiakna a neihpui dawn tih sawiin, chi leh chi inkara buaina thleng mek a reh theih nan sorkar laipui chuan hmalak ṭan an tum a ni. Inbiakna hmang hian Kuki leh Meitei inkara khi chat awm chu tihzim an tum bakah, remna leh muanna Manipur in a neih let leh theih a beisei tih Shah chuan a sawi.

Meeting-ah hian Manipur venhimna lam dinhmun sawi ho a ni bawk a, Home Minister chuan state chhunga dan leh thupek kenkawh nan leh boruak ralmuang a awm theih nan central force an awm a pawimawh thu a sawi. Shah chuan central force-te chu awmze nei taka hman an ngaih thu leh, a pawimawh laiah dah an ngai a ni tiin, mamawh dan a zirin sipai tirh luh belh a ni dawn tih a sawi bawk. Shah chuan thuneitute chu buaina chawk chhuak zawnga khawsa ṭhin dim lo turin a chah a, sorkar laipui chuan Manipur chhunga remna a awm theih nan hma an la reng a ni, a ti.

Manipur buaina hian ziaawm lam a la pan hleithei lo a, tun hnaiah Jiribam district-ah buaina a chhuah leh avangin Assam lamah raltlan tam tak an awm belh leh tawh a ni. Kuki-Zo leh Meitei inkara buaina chhuak hi kum khat a ral hnu pawhin ziaawm lam a la pan thei lo a, nikum May 3 aṭanga chhiarin, buaina avang hian mi 225 velin nunna chan tawhin mi 50,000 chuangin an in leh lo an chhuahsan tawh bawk.