Meghalaya : Zirlai pawlin Tribal ni lo reservation pek an duh lo

Hynñiewtrep Inte­grated Territorial Organization (HITO) students wing chuan Meghalaya chhunga tribal ni lo, ram leilung fa anga inchhal ten zirna in leh hna lakah reservation pek ve an phut tih an sawi chu thil awm lo tak a ni, an ti.

HITO students wing chuan heng tribal ni lote hi chuan an rawn chawr chhuahna state-ah reservation chu dil ve mai se tiin, state sorkar chu tribal ni lote duhdan ngaih pawimawhsak lo tura an duh thu an sawi bawk. Meghalaya ramchhungah hetiang phut theihna dan hi an nei lo tih an tarlang. Tribal ni lote ngenna tihhlawhtlin a nih chuan state chhungah buaina a chhuah phah a hlauhawm niin an sawi.

Zirlai pawl hian state chhunga ILP hman ve an duh chhan pakhat pawh tribal ni lo an tam vang a ni tih an sawi a, Meghalaya Transfer of Land Regulation Act 1971 dan hnuaiah chuan tribal ni lote tan Meghalaya chhungah ram a neih theih loh tih a tarlang a ni. HITO zirlai pawl chuan Meghalaya state a hlangkai tura an nawr lai pawhin tribal ni lote chuan tha an thawh ve lo tiin, tun dinhmuna state in hamṭhatna a pek theih an duh ve leh si chu thil awm ang lo tak a ni, an ti.

Meghalaya job reservation policy hi ennawn a ni dawn a, tun thla tir lam khan state sorkar chuan hemi pual hian expert committee a din a ni. Meghalaya chhunga hnam hrang hrangte tana reservation dah dan ennawn a ni tur hian sawi a hlawh hle a, reservation la nei ve ngai lo tribal ni lo state chhunga inbengbelte pawhin anmahni puala reservation neih ve hi an duh tih expert committe hnenah hian an lo thlen tawh a ni.