Arunachal : Independent MLA pathumin BJP sorkar an thlawp

Arunachal Pradesh-a sorkarna siamtu, Bharatiya Janata Party (BJP) chu independent a thlan tlin Member of Legislative Assembly pathum chuan an thlawp tih an puang.

Independent MLA pathum - Laisam Simai, Wanglam Sawin leh Tenzin Nima Glow te chuan Arunachal chief minister Pema Khandu hnenah an thlawp tur thu hi ziakin an thlen tih BJP chuan an tarlang. CM Khandu chuan independent MLA pathumte hnenah BJP sorkar an thlawp avangin lawmthu a hrilh a, state hmasawnna an duhzia tilangtu pakhat a ni tiin, Arunachal hmasawn zel nan an thawk ho dawn tih a sawi.

Arunachal-ah hian BJP chuan assembly seat awm 60 aṭangin seat 46 an la a, North-East Democratic Alliance (NEDA)-a an thawhpui National People’s Party (NPP) chuan seat 5 lain Nationalist Congress Party - Ajit Pawar (NCP-AP) chuan seat thum an la ve bawk. Heng a nih avang hian independent MLA te thlawpna tel lo pawh hian sorkarna an siam thei tho a ni.