Sikkim : Khualzin tangte chhan chhuah hna thawk mek

Sikkim hmar lama khualzin tangkhang mekte chhan chhuah hna chu Thawhṭanni aṭang khan ṭan a ni. Sikkim-ah hian ruah sur nasa vangin hmun tam takah leimin awmin, kalkawng pawimawh tak tak a ping a ni. Sikkim tourism minister Tshering Thendup Bhutia chuan khualzin 1800 chuang North Sikkim lamah an tangkhang mek niin a sawi.

Border Roads Organi­sation (BRO) chuan district thuneitute leh National Disaster Response Force (NDRF) puihnain a batch hmasa ber atan khualzin 50 an chhan chhuak a, Mangan khaw lam an panpui. North Sikkim-ah hian Dzongu, Chungthang leh Lachung hmunte chu Teesta lui lianin a kalpawhna lei (bridge) a lak avangin kalpawh theih an ni lo. Thuneitute chuan khualzin tangte hi thlawhtheihna hmanga thiar chhuah tum mah se khaw awm danin a zir loh vangin hman theih a ni rih lo. Mahse Minister chuan khua a ṭhat veleh hman theih turin Bagdogra airport ah IAF helicopter te hi an awm tawh a ni, a ti.

Khualzin tangte chhan chhuah hna hi vawiin lamah pawh thawh chhunzawm tum a ni. Minister Bhutia chuan chhan chhuah hna hi a tahtawla thawh tur a ni tih sawiin damlo, naupang leh tar chak lote chu thiar chhuah hmasakah an nei dawn tih a sawi. Mangan district commissioner Hem Kumar Chettri chuan North Sikkim lama hotel neitute chu khualzin tangte chhuah luihtir lo turin an chah tawh tih sawiin, khualzinten mamawh an tlakchham loh nan hma an la reng tih a sawi bawk.