Assam CM-in BSF te tan la turin ngen
Assam Chief Minister Sarbananda Sonowal chuan Inrinni khan Border Security Force (BSF) chu India-Bangladesh border venhim kawngah khauh zawka hma la tturin a ngen.
CM leh BSF thuneitute hian Guwhati-an inkawmkhawmna an nei a, he hunah hian Director General K.K. Sharma pawh a tel.
Sonowal chuan BSF aiawhte hnenah hian ngenna siamin hun rei tak chhung an la buaipui tawh leh, poilitics inchirh theh nana an lo hman fo tawh Bangladesh aṭanga dan loa India lut ṭhin te titawp turin a ngen a, ramri hungna chu a him tawk em tih thlithlai reng turin a ngen a ni. Ramri venhimna tichak tur hian technology ṭha tak hmanga hma lak a ngai tih sawiin, hnathawktute pawh tun lai thiamna ṭhang zel mila mahni pawh ṭan laturin a ngen a ni. Chu chuan nasa takin venhimna kawngah a pui thei dawn niin a sawi bawk.
Assam-ah hian inthlan neih a nih dawn khan ramri chungchangah nasa takin Congress leh BJP te chu an lo inbei tawh a, kha tih hun laia sorkar Congress party chu vote zawn nana hmangah hial puh an ni. Campaign kalpui a nih lai khan party lian pahnih te chuan Bangladesh aṭanga dan lo India rama lut ṭhin te titawp tur hian hma an lak tur thu an intiam ve ve bawk.
BJP sorkar lakluh a nih aṭanga reiloteah ramri chungchanga hmalakna tur sawiho a ni hian mipuiteah sorkar thar laka beiseina pawh a siam phah ngei rin a ni. BJP chuan sorkarna an siam theih a nih chuan chak taka hma an lak tur thu sawiin, an thawhpui party te nen sorkar an siam tak hnua an ramri chungchanga an hmalak na hmasaah a ngaih theih.
Sonowal chuan ramri chungchangah hian mipuite ṭanrual a ngai a ni a ti a, dan loa lut ṭhin te leh ramri kaltlanga ralthuam tawlhruk chu tihtawp thuai a ni ang, a ti. Sorkar chuan BSF te hmalakna chu a thlawp tih sawiin, km 42 zeta thui Bangladesh nena inrinna chu state sorkar chuan venghim turin theih tawp a chhuah dawn tih a sawi.
Assam CM Sarbananda Sonowal leh General Officer Commanding 4 Corps, Lieutenant General Debraj Anbu te chuan state chhunga venhimna kalpui dan te an thlir ho bawk a ni. Lieutenant General Anbu chuan Sonowal chu fakin Assam mipuite himna ngaipawimawhtu a ni a ti a, thawhhona ṭha an neih zel a beisei thu a sawi ve bawk.