Manipur-ah zirlaiten lungawi lohna lantir
Imphal, Manipur-ah chuan Inrinni khan zirlai hmeichhia eng emaw zat chu lungawilohna lantira nawrh huaihawtnaah hliam an tuar a, police te chuan zirlai pahnih an man bawk.
Heng zirlai zinga a tam zawk te hi T.G. Higher Secondary school a mite an ni a, zirlai thinrim leh police te chu innawr buaiin, a hnuah zirlaite hi police te chuan an umzui nia hriat a ni. Zirlai lungawilohna lantirtute hian an state-a ILP hman phuta lungawi lohna an lantir ṭuma police-ten an zirlai pui pahnih, Bruce leh Vidyalakshmi te chu chhuah turin an phut a ni.
Zirlaite chuan police te chetdan chu an dem tak zet tih sawiin, zirlaiah pawh hmeichhia te chunga tha an thawh chu thil awm lo nia an ngaih thu an sawi. C.C. Higher Secondary school-a zirlai te chuan lungawi lohna hi lantir ve bawkin Chief Minister O Ibobi Singh lim an hal a, kawng dungah ṭhuin police te chet dan an dem thu an auchhuahpui bawk.
College Students Council pawhin Manipur-a college hrang hrang-a zirlaite chu semester leh university exam te chu an zirlaipuite chhuah an nih hma loh chuan chhunzawm lo turin hriattirna an chhuah ve nghal bawk. Hetih lai hian zirlai ṭhenkhat te chuan exam chhunzawm an duh thu sawiin, D.M.College of Arts-a zirlaite chuan venhimna hnuaiah exam hi an kaltlangpui a ni. D.M.College of Sciences leh D.M. College of Commerce-ah te erawh exam hi chhunzawm theih a ni lo thung. Principal T. Ibomcha chuan exam neih mek chu university-in hun a tiam hunah chhunzawm leh a ni ang, a ti.
Zirlaite lungawilote chuan police te chu sorkar thuneitute nena inbiakna neih a nih theih nana hun siam sak turin an phut tih an sawi. College Students’ Council te chuan an zirlaipui Bruce leh Vidyalakshmi te chhuah an nih hma loh chuan kawng hrang hranga sorkar nawr an tum thu an sawi ve bawk.