Right-wing activist-ten sahuana ramsa hnena bawngsa pek duh lo

Assam-a BJP hruaitu Satya Rajan Borah kaihhruai right-wing activist-te chuan Assam State Zoo-a sahel ei chi ramsa, a bikin sakeite ei tura bawngsa pek ṭhin chu an duh loh thu an sawi.  

Borah hoin activist-te hian Thawhṭanni khan lungawi lohna lantirin sahuan pawhtu kawngpuite chu darkar eng emaw zat an dang a, ramsa ei tur phurtu motor-te pawh sahuan an luh an remti lo a ni. Pungkhawmte hian bawng talh khapna dan siam an phut thute an aupui a ni. 

BJP hruaitu chuan, "Hindu society-ah bawng humhalh hi kan dah pawimawh em em a, mahse sahuana ramsa te chu bawngsa pek an ni. Engvangin nge bawngsa kher pek an nih a, sa dang pawh pek an nih mai loh?" tiin a sawi. 

Assam State Zoo-a Divisional Forest Officer Tejas Mariswamy chuan sahuan bulah nawrh huaihawtte  police puihnain hnawtdarh an nih thu a sawi. 

Official-te chuan pungkhawmte hnena ramsate ei tur pek chungchanga thunei­tu, Central Zoo Authority hnenah an thil phut chu ziaka thehlut turin an hrilh. 

State forest minister Parimal Sukla­baidya chuan ramsate hnena bawngsa pek ṭhin chu tihdan phung leh, an tana ei tur ṭha a nih vang a ni tih a sawi. "State ṭhenkhatah chuan bawngsa ei khap a ni a, hei vang hian sahuan lama thuneitute chuan bawngsa aiah lawisa te an pek ṭhin. Mahse Assam-ah chuan ramsate mamawh ang zat pe turin lawisa kan ngah tawk lo a ni," a ti. 

Assam State Zoo-ah hian ramsate hi kar khatah bawngsa ṭum khat pek an ni ṭhin. He sahuan hi kum 1957-a din niin, hectare 175-a zau a ni. Hmarchhak biala sahuan zingah a lian ber niin, ramsa 1,000 chuang an awm a, tlawhtu pawh an ṭhahnem thei hle. Mahse Covid-19 leng vangin sahuan hi tlawh theih lohin thla sarih khar a ni tawh.