Manipur zirlai pawlin private school boycott-ah vau

Manipur zirlai pawl, All Manipur Students' Union (AMSU) chuan an state-a private school-te chu Covid-19 leng vanga zirna khar chhungin zirlai hnen aṭangin monthly fee la lo turin a ti a, an la lui a nih chuan boycott an tum tih an sawi. 

AMSU chuan school khar a nih chhunga zirlaite fee chawi tir loh phutin an campaign mek a ni. 

Tun hnaiah Manipur sorkar chuan thuchhuah siamin, private leh aided school te hripui leng vanga zirna in khar a nih hnu, kumin April thla aṭangin zirlaite monthly fee chu 30% la turin a ti a ni. 

Hei hi zirlai pawl chuan na takin an sawisel  nghal a,  zirna in khar a nih chhunga zirlaite fee chawi tir hi duh loin, fee lak phalna thupek tichhuaktu Education Department pawh an lo kharsak tawh a ni. Sorkar hnenah he thupek hi sut turin an phut. 

AMSU chuan sorkarin fee lak phalna a siam hi sut tura an nawr mek laiin, private school ṭhenkhat chuan zirlaite hnen aṭangin fee hi an la ṭan tawh a, ṭhenkhat phei chuan fee hi pe tla thuai turin an nawr a ni, a ti.