Sarkar-a'n Tripura Governor sawisel

Tripura chief minister hlui, CPI(M) hotu Manik Sarkar chuan an state governor Ramesh Bais chu sawiselin, Rashtriya Swayamsevak Sangh (RSS)-in an duh duha an thunun theih a ni tih a sawi. 

Governor hian Tripura Assembly of Journalists (TAJ)-te thil phut chungchangah hma a laksak duh lo nia sawi a ni a, hei vang hian Sarkar chuan Bais hi sawiselin, "RSS enkawl factory aṭanga chhuak a ni a, hetiang mi hi Raj Bhavan enkawl turin ruat a ni si a ni," tiin an state-a BJP kaihhruai sorkar chu na takin a bei zui bawk. Sarkar chuan, "BJP sorkar hnuaiah communist hruaitute, worker leh supporter-te chauh ni lo, media mite pawh Tripura-ah chuan an him tawh lo a ni. Chief minister Biplab Kumar Deb-a'n media mite beihna thu a sawichhuah hnuah journalist 10-12 velin beih an tawk tawh a ni," a ti. 

CM hlui chuan TAJ palaite chuan Governor hi hmuin, Chief Minister-in media mite a beihna thu a sawi chu sut tir turin an ngena ni. Governor chuan CM hi hmuin lo sawipui a tiam a, mahse tun thlengin hma a la zui lo tih Sarkar chuan a sawi.