Tribal ten June 9 atangin lungawi lohna lantir leh dawn

Manipur-a tribal inzawm khawm pawl Manipur Tribals’ Forum (MTF) chuan Manipur assembly-in “anti-tribal bills” a pass duh lohna lantir nan June 9 zanlai aṭangin lungawi lohna lan tir leh an tum thu an sawi.

Manipur assembly-in “anti-tribal bills” a pass avang hian tribal te chuan vawi eng emaw zat lungawi lohna an lo lantir tawh a, state sorkar chu sût leh turin an nawr mek a ni. MTF hruaitu inhmukhawm te chuan “anti-tribal bills” sût leh a nih theih nan hian a tawp thlenga an beih tur thu sawiin, “do-or-die” movement chu kalpui a ni dawn an ni, an ti. NDA sorkar chu 'vote bank politics' khel lo turin an duh thu sawiin, Prime Minister Narendra Modi hnenah memorandum thehluh a nih tur thu an sawi bawk.

Manipur Tribals’ Forum te chuan Joint Committee on Inner Line Permit System (JCILPS) ten bill pathum Manipur Legis-lative Assembly-in a lo pass tawh, Protection of Manipur Peoples Bill, 2015,Manipur Land Revenue & land Reforms (Seventh Amendment) Bill, 2015 leh Manipur Shop & Establishment (Second Amendment) Bill, 2015 te tih khawtlai a nih duh loa an nawrna chu an thlawp tih an sawi.

“Anti-tribal bills” duh lohna lantira buaina chhuakah mi pakua te chuan nunna chan tawh mah se a tawp thleng an beih tur thu MTF te chuan an sawi. “Anti-tribal bills” chu tribal-te dikna leh chanvo rahbehna a ni an ti a, "state sorkar chu sut leh turin kan ngen nawn leh a ni" an ti. He bill hian Article 371C leh Manipur State Hill People Regulation, 1947 te a bawhchhia a ni, an ti.

Hetih lai hian state sorkar chuan “Anti-tribal bills” hian Article 371C of the Indian Constitution a bawhchhiat loh thu leh MLR&LR Act 1960 chu valley district - Imphal West, Imphal East, Thoubal bakah Bishnupur leh Churachandpur district ṭhenkhat-ah chauh hman a nih theih thu a tarlang. Tribal-te dikna leh chanvo rahbeh chu state sorkar thil tum a nih loh thu tarlan a ni bawk. Presidential order of 1972 leh Manipur State Hill People Regulation, 1947 behchhana bill hi siam a nih thu an tarlang bawk a ni.

Mahse Manipur Tribals’ Forum-in a tarlan dan chuan Tribal identity, land rights leh economy te 'anti-tribal Bills' hmang hian rahbeh sak an ni dawn niin an sawi a, State sorkar lakah rinna an hloh mek tih an sawi bawk.