Tezu-ah ‘Vehicle Free Day’ hmang ṭhin dawn

Boruak bawlhhlawh chak zel ven nan Arunachal Pradesh-a Tezu khawpuiah chuan thla tin ni sarihnaah 'vehicle-free day' hman ṭhin a ni tawh dawn. Thupek hi Zirtawpni-a World Environment Day hman an nih khan puan a ni.

Lohit District-a Tezu hi Arunachal Pradesh state-a khawpui lian ber pawl a ni a, mihring 50,000 vel an cheng a ni. Arunachal ram zau zawk hi tlang ram ni mah se lirthei a pung chak hle a, an state khawpui pahnih Itanagar leh Naharlagun-ah te chuan darkar nga chuang te lirthei an tangkhang ṭhin a ni. Lirthei khu hian nasa takin boruak a tibawlhhlawh a, chu chuan nasa takin environment a nghawng a ni.

Sorkar hna thawk zawng zawng te pawh 'vehicle-free day' hian a huam dawn a, thla khat chhunga 'vehicle-free day' hman ṭhin chu a remchan dan anga tihpun zel a nih tur thu Lohit deputy commissioner Danish Ashraf chuan a sawi. Hei hian nasa takin sorkar sum luangral a ven dawn bakah, boruak thianghlim leh hrisel zawk mipuiten an hip thei dawn niin Ashraf chuan a sawi. He thupek hi khauh taka kenkawh a nih tur thu sawiin, emergency duty bakah, hmeichhia, an hriselna dinhmun ṭha tawk lote erawh chu ngaihnathiamna pek an ni dawn tih Lohit deputy commissioner Danish Ashraf chuan a sawi bawk.