Assam CM leh Foreigners Tribunal te inkawm

Assam Chief Minister Sarbanan-da Sonowal leh Foreigners Tribunal te chuan Pathianni khan Guwahati-ah meeting an nei. He meeting-ah hian dan loa ramri kan leh ramdang mi dap chhuah chungchang te sawiho a ni.

Sonowal chuan Foreigners Tribunal hmalakna leh hnathawhte chu India ram-a state zawng zawng te chuan an thlir reng a ni a ti a, National Register of Citizens kalpui mek chu fimkhur taka kalpui a ṭul thu a sawi. Tribunal member te chu ram leh hnam tana hna thawktu pawimawh tak an nih thu sawiin, dik tak leh rinawm taka ram tana thawk tura a duh thu a sawi bawk. Sonowal chuan state sorkar chuan Tribunals hnathawh chu a thlawp tlat tih sawiin, an mamawh leh thil ṭuldangte ngaihtuah sak zel a tiam a, mipuite chu an hnathawhte thlawp tur leh an tha tichak tura ṭanrual a ṭul thu leh, ṭhenawm ram Bangladesh aṭanga dan loa lut leh khawsa zuite dap chhuah kawngah hmalak mek a nih thute a sawi. Tribunals te hmalakna tiṭhuanawp zawnga chetna reng reng chu sorkarin a chingfel zel dawn a, India khua leh tui ni lo tan NRC-ah hming chuan ve a rem lo a, dik taka kalpui a ni tur a ni tiin CM chuan a sawi.

Tribunal-te chuan harsatna an tawh te tarlangin, infrastructure leh hnathawktute hman tur bungrua an duh khawp an neih loh thu Assam chief Minister hnenah hian an thlen a,Sonowal chuan state sorkar chuan an harsatna sutkian dan kawng a ngaihtuah sak tur thu a sawi. Assam Chief Secretary VK Pipersenia pawhin thu sawiin, NRC kalpui mek chu ramdang mite dapchhuahna ṭangakai tak a ni a ti a, dik leh felfai taka kalpui zel ni thei se a duh thu a sawi ve bawk. Assam Police Director General Mukesh Sahay pawhin ramdang mite dap chhuah kawngah an hmalakna reng reng an thlawp tlat tur thu a sawi ve bawk a ni.