‘Nagaland Vision 2030’ hawng

Nagaland sorkar hmalakna kalpui tur “Nagaland Vision 2030” document leh website te chu Thawhṭanni khan parliamentary secretary for planning and coordination, evaluation and monitoring cell and taxes changtu Neiba Kronu chuan chief secretary conference hall-ah a hawng.

State chief minister T.R. Zeliang chuan May 5 khan “Nagaland Vision 2030” hi kalpui a nih tur thu a lo sawi tawh. He programme hawnnaa thusawitu Neiba chuan, “Nagaland Vision 2030” chu state economy chawikanna tura duan a ni a ti a, vision document hmang hian investor-te chawk luhna tum a ni a ti. Sorkar laipui chuan Nagaland state tana 'special plan assistance project' kalpui nana sum a pek
ṭhin chu a titawp tawh a, chuvangin “Nagaland Vision 2030” hi state hmasawn nan kalpui a ngai niin Neiba chuan a sawi.

State sorkar chuan kum 2011 daih tawh khan “Nagaland Vision 2030” kalpui hi a lo remti tawh a, State chief secretary hlui Alemtemshi Jamir chu Nagaland Vision 2030' atan hian convener-ah ruat a ni. Hemi pual hian, website- nagalandvision2030.in siam a ni a, facebook account- Nagaland Vision 2030, whatsapp account- 8415856752 leh email account- nagalandvision2030@gmail.com te chu mipuiten rawtna an thlen ve theih nan leh sorkar hmalakna te awlsam zawka an hriat zung zung theih nan siam a ni bawk. “Nagaland Vision 2030” chungchanga rawtna neite chuan Convenor, Nagaland Vision 2030, Capital Convention Centre, New Secretariat Area, Kohima-797003-ah a thawn thei dawn bawk a ni. Dr. Manoj Pant, JNU chu vision document vil tur hian ruat a ni bawk.