Manipur : Congress-in state buaina sawi honaa CM telh a ni lo dem
Manipur Pradesh Congress Committee (MPCC) chuan union home minister Amit Shah hoa Manipur buaina chungchang sawi hona neihah Manipur chief minister N Biren Singh telh a ni ve lo chu an dem takzet tih an sawi.
MPCC President Keisham Meghachandra chuan, Manipur aiawh turin Chief Minister emaw MLA emaw telh an ni lo chu pawi a tih thu sawiin, sorkar laipuiin state chhung buaina chungchang sawi hona, state aiawh politician tel loa an nei chu Manipur mipui leh Chief Minister tan thil zahthlak tak a ni tiin 7th Schedule bawhchhiatna a ni, a ti. Manipur chungchang sawi honaah hian state aiawhin unified command chairman leh DGP chauh Delhi-ah hian an kal a ni.
Sorkar laipui chuan Manipur mipuite chu ngaihthah lose a duh tih sawiin, India khua leh tui an nih angin midang nen angkhata en an duh tih Meghachandra chuan a sawi. Sorkar laipui chuan ramri hung leh FMR tihtawp a nih thu puang mah se a takah erawh hmalakna a awm lo tiin Modi kaihhruai sorkar chu a beizui bawk. Union Home Minister-in Manipur buaina chu MP inthlan result puan a nih hnuah chin fel a ni dawn ti mah se tun thlenga buaina a la reh lo chu pawi a ti a, buaina vang hian mipuiten an tuar nasa hle tih Meghachandra chuan a sawi bawk.
Committee on Tribal Unity (CoTU), Sadar-Hills chuan state chhung buaina chungchang sawi honaa politician telh an ni lo chu lawmawm an tih thu an sawi ve thung. CoTU chuan buaina a reh theih nana Amit Shah hmalakna chu lawmawm an tiin rah ṭha a chhuah ngei an beisei a, Meitei lamin ralthuam dahkhawmna hmun aṭanga ralthuam ṭha tak tak an ruk chhuah reng avangin Manipur-a central force dah luh belh chu boruak a ralmuan theih nan a pawimawh hle tih an tarlang bawk.
COTU chuan an buaina chin fel a nih thuai an beisei tih sawiin, Kuki-Zo hnamte tan Union Territory, Legislature nei pek ngei an inbeisei a, India tana an hnamin an thawhhlawk ṭhin zia an tarlang bawk. "Tuna hmalakna hi Manipur chhunga remna leh muanna a awm theih nan a pawimawh hle a ni" CoTU chuan an ti.