Tripura : Police officer chawl tawh 67 chhawr dawn

Tripura transport minister Sushanta Chowdhury chuan police officer chawl tawh mi 67 chu contract-in chhawr leh an ni dawn tih a sawi. Heng officer-te hi Agartala airport bakah Nischintapur leh Sabroom-a Integrated Checkpost a immigration centre-ah thawk tura chhawr nawn an ni.

Minister Chowdhury chuan council of minister-in officer pension tawhte chhawr nawn leh hi a pawm tawh a ti a, sorkar laipuia home ministry hnenah Maharaja Bir Bikram Airport, Agartala-a immigration centre din dilna an thlen anga, phalna an hmuh hnua international flight ṭan a nih hunah heng police officer chawl tawhte hi he centre-ah hian chhawr an ni dawn tih a sawi. Police officer rawih nawn an nih leh chhan pakhat chu MBB airport-a duty tur CISF indaih lohna vang a ni tih a sawi bawk.

Chowdhury chuan cabinet ṭhukhawmin Health & Family welfare leh Food & Civil supplies department hnuaiah hna 469 lakna tur a pawm bawk tih a sawi. Medical Officer post 226, health department hnuaiah siam belh leh hnawhkhah a ni dawn tih sawiin super-specialist medical officers 16 leh specialist medical officers 172 lak a nih tur thu a sawi.