Manipur : Governor leh AR hotuin Jiribam buaina chungchang sawi dun

Manipur governor Anusuiya Uikey leh Assam Rifles (South) Inspector General, Major General Ravroop Singh chuan Nilaini khan buaina chhuah tharna hmun, Jiribam dinhmun chungchang an sawi dun. IG Singh chuan Assam nena an ramria venhimna kalpui a nih dante Governor hi a hrilh a ni.

Governor hian Assam Rifles IG chu Jiribam mipuite puih an ngaihnaa pui turin a chah a, thil duhawm lo dang a thlen tawh loh nan venhimna tikhauh lehzual turin a chah bawk. Uikey hian Pathianni khan New Delhi-ah President, Home minister leh Finance minister-te hmuin an state chhung dinhmun hrilhfiahin, sorkar laipui chu pui turin a ngen nghal bawk a ni. Uikey hian tharum thawhna a reh theih nan hma la turin sorkar laipui chu a ngen a, hemi bakah hian hnam pahnih inkara innghirnghona awm chu tihreh thuai a ngai tiin state chhunga remna leh muanna tluantling a awm theih nan hma la turin a ngen bawk a ni.

Assam Rifles IG Singh hian Governor hnenah Jiribam buaina chungchanga hma an lak dan a hrilhfiah a, boruak ralmuang zawk a awm theih nan theihtawp an chhuah mek thu a sawi. Barak leh Jiri lui dungah ngawrh lehzuala patrol a ni tih Singh chuan sawiin, pawikhawihna thlen hlauhawmna hmunte chu an veng uluk zual bik tih a sawi bawk. Kar liamta Inrinni khan Assam leh Manipur aiawh police officer-te chuan Jiribam buaina chungchang hi an sawi ho a, hmalak dan tur an lo rel tawh bawk.