Arunachal Minister-in department-a eirukna then fai a tiam

Arunachal Pradesh Rural Development and Panchayati Raj minister, Ojing Tasing chuan department pahnih, an sum dawnte hmang ṭangkai lo leh eirukna hluarna nia sawite chu a enfiah dawn tih sawiin, langtlang sorkar kalpui an tum tih a tarlang.

Tasing hi chief minister Pema Khandu kaihhruai sorkarah a vawikhat nan minister nihna pek niin, Rural Development and Pachayati Raj bakah Cooperation leh Transport department a chang tel bawk. Tasing chuan mipui tana hnathawk tur chuan sorkar chak ṭha neih leh sum chungchanga mawhphurhna la ngam sorkar nih a pawimawh tih a sawi a, a department chan pahniha sum chevel fel lo tak awm chu a chhan a chhui dawn thu leh, chinfel dan a zawng dawn tih a sawi.

Tasing chuan a department chu ṭha taka enkawl a tum tih sawiin, Chief Minister-in a hna chanpual a pek chu ṭha taka hlen a tum thu a sawi. Rural Development department-a sorkar laipui aṭanga sum lut hman dik loh tam lutuk chu enfiah a, mipuite tana ṭha taka hman a nih theih nan minister hian hmalak a tum a ni.