Manipur : ITLF-in Kuki-Zo hnam tan UT an phut

Indigenous Tribal Leaders Forum (ITLF) chuan Manipur-a Kuki-Zo hnam tan Union Territory pek an phut tih an tarlang. An thil phut a hlawhtlin theih nan June 24, Thawhṭanni lo awm turah hian ralmuang takin UT an duhna lantir an tum.

ITLF chuan Article 239A hnuaiah Manipur-a cheng Kuki-Zo hnamte tan Union Territory pek an phut tih tarlangin, Autonomous District Council (ADC) inthlan lo awm tur chu an duh lo tih an tarlang tel bawk. ITLF thupuangtu, Ginza Vualzong chuan an thil phut chu sorkar laipui hriattir a pawimawh tih a sawi a, Manipur sorkarin ADC inthlan huaihawt a tum chu Kuki-Zo hnam inkara hêm thlak a tum vang chauh niin a ngai bawk. "Manipur aṭanga inlakhran hi kan duh ber a ni a, kan thil phutte tihhlawhtlin tumna a awm loh avangin kan mi leh sate chu ADC inthlan lo awm turah tel lo turin kan inchah a ni," Vualzong chuan a ti.

ITLF chuan India leh Myanmar ramria zalen taka inkalpawh theihna (FMR) tihtawp a ni chu an duh lo a, hemi chungchanga an thutlukna sut tur hian union home minister Amit Shah hnenah ngenna an thehlut tawh tih a sawi bawk. Ramri hung leh FMR tihtawp chuan tribal-te nunah nghawng a nei tih ITLF thupuangtu chuan a sawi bawk.

Jiribam district-ah police outpost hal

Manipur police chuan Nilaini zan khan police outpost hal a nih thu leh, a haltu helpawlte nen Jiribam district khawthlang lamah an inkap tih an puang. Police outpost hal hi Leingangpokpi hmuna mi niin, hal a nih hnu hian police leh kangṭhelhtu pawl chu a hmunah an thleng nghal a ni. Jiribam district-a police outpost hal hi Nilaini zan dar 10 vela thleng niin, police te hi outpost pana an kal laiin ralthuam keng helpawl lam hian Phaiton tlang aṭangin an lo kap a, hun eng emaw chen inkap mah se thi leh hliam an awm lo nia tarlan a ni a, police motor leh kangṭhelh motor pakhat erawh kah chhiat a ni. Police leh helpawl hi Ningani zing dar 1 thleng an inkap a, buaina chhuahna hmunah hian police leh armed forces tirh luh belh an ni bawk.

Jiribam district-ah hian June 6 hnuah police outpost pathum hal a ni tawh a, hemi bakah hian chenna in 80 chuang halral a ni tawh bawk. Manipur hmun dangah May 3, 2023 a buaina a chhuah lai khan hnam hrang hrang inchenpawlhna, Jiribam-ah hian buaina chhuak ve lo mah se tun thla tir lam aṭang khan buaina chhuakin Assam lamah raltlan tam tak an awm phah a ni.

Kangpokpi-ah truck hal a ni

Kangpokpi district-ah Nilaini zan vek khan Dimapur lam pan truck chu mipui pung khawmin lo dangin an hal. He thil hi Kangpokpi leh Changoubung khaw inkar kawnga thleng niin, lirthei khalhtu leh amah puitu erawh hliam tuar loin mipui kut aṭangin an tlan chhuak thei nia tarlan a ni.

Truck hal a ni tih an hriat hnuah Kangpokpi police leh kangṭhelh pawlte chuan a hmun an pan nghal a, mahse truck chu a lo kangchhe hman tawh hle a ni. Kangpokpi police-te chuan truck haltu tak hi tute nge an nih hriat an la ni lo tih sawiin, an hal chhan pawh hi thuchiang a la awm lo, an ti. Kangpokpi district-ah hian tunkar chhungin motor hal ṭum hnih a thlenna niin, June 17, Thawhṭanni khan mipui pung khawm chuan CRPF phurtu bus an lo hal tawh bawk.