Arunachal CM in langtlang taka sorkar hna lak a tiam

Arunachal Pradesh chief minister Pema Khandu chuan Arunachal Pradesh Public Service Commission (APPSC) hna lak chu langtlang leh dik taka kalpui a nih tur thu a sawi. Khandu hi APPSC chairman, Prof Pradip Lingfa kaihhruaina hnuaia meeting neihah telin, APPSC tihchak dan tur leh exam buatsaih a nih dan turte an sawi ho a ni.

Arunachal CM chuan meeting-ah hian APPSC thuamchak a nih dan tur an sawi ho bakah exam zawng zawng dik leh fel fai taka neih a nih theih dan an sawi ho a ni, a ti. Commission kaltlanga hna lak chu langtlang taka kalpui an tum thu sawiin, an state tan hna lakna chak ṭha leh hman tlak tak din turin an ṭangho dawn tih a tarlang. Khandu chuan Prof Lingfa hoa meeting an neih chu a hlawkthlakin, APPSC ṭha zawk din a nih theih nan hma an la dawn tih a sawi.

APPSC hian hna lak kawngah hmingchhiatna a tawk ṭhin a, zawhna putru avanga thubuai an neih chu tun thleng hian Central Bureau of Investigation (CBI) chuan chhuizui hna an la kalpui mek a ni. Khandu kaihhruai sorkar chuan kum 2022 hnua a vawikhat nan kumtir khan chairman thar an ruat a, hemi bakah hian commission-in mipui rinna a neih let leh theih nan hma a la reng a ni.