Priyanka-i'n tuilian tuar ṭanpui turin Assam sorkar a ngen

Tuilian vanga harsatna tawk mek, Assam mipuite ṭanpuina pe chhuak turin Congress party hruaitu, Priyanka Gandhi Vadra chuan Assam sorkar a ngen. Harsatna tawkte chhan chhuah hna rang taka kalpui tur leh, nunna chan chhungte hnena zángnadawmna pe chhuak turin Assam sorkar chu a ngen a ni.

Priyanka chuan Assam-a khuarel chhiatna vanga nunna chan an awm chu pawi a tih thu sawiin, tuilian vanga harsatna tawk mi tam tak an awm chu pawi a tih thu a sawi bawk. "State sorkar hian chhanchhuah hna hi rang takin thawk se ka duh a, mitthi chhungte pawh an phu ang zángnadawmna hmu ngei se ka duh a ni," a ti. Congress general secretary hian Congress worker leh hruaitute chu harsatna tawkte tan an theihna laia tha thawh ve turin a sawm bawk.

Congress party president Mallikarjun Kharge pawhin Assam-in harsatna a tawh mekah sorkar laipui leh Assam-a sorkarna siam mek, BJP sorkar chu an thutiama ding loah a puh ve bawk. BJP sorkar chuan Assam chu tuilian awm lohna (flood-free) a siam turin thu tiam mah se an thutiamah hian an hlawhtling lo a ni, tiin Assam mipuite chu BJP sorkar chuan a bum a ni, a ti. Congress hotupa chuan tuilian vanga harsatna tawk mekte chu a tawrhpui thu sawiin, prime minister Narendra Modi sorkar leh Assam sorkar chuan mipuite tan a rang thei ang berin chhawmdawlna pe chhuak se a duh tih a sawi.

Ruahsur nasa avang hian state chhung lui hrang hrangte an lian a, tuilian hi district 22-a khaw 1,311 velin an tuar a ni. Tuilian hian thlai chinna, ram hectare 6,424.83-a zau a nghawng bakah, ran vulh nuai 3.5 chuangin an tuar bawk.

Assam chief minister Himanta Biswa Sarma chuan tun thlengin tuilian hian district 10 a la nghawng tih sawiin mi 1,17,212 chuangin an la tuar mek tih a sawi bawk. Assam CM hian tuilian tuarte tan district hrang hrangah chhawmdawlna-in 134 siam a nih thu tarlangin, relief distribution centers 94-ah mi 17,661 an awm mek tih a tarlang bawk. Assam thuneitute chuan khuarel chhiatna thleng vangin state chhungah mi 37 in nunna an chan tawh tih an tarlang a, chin hriat lohin mi pakhat a awm mek bawk a ni.