Hmarchhak state zinga DDP report pe hmasa ber Nagaland

Nagaland Economics & Statistics leh Information Technology & Communication advisor, H. Sethrongkyu Sangtam chuan kar liamta Zirtawpni khan District Domestic Product (DDP) of Nagaland a tlangzarh. Hmarchhak state zinga DDP report pe hmasa ber an ni a, Directorate of Economics & Statistics-in workshop an buatsaihah DDP report hi tlangzarh a ni.

DDP report-ah hian state chhung district hrang hrang sum leh pai dinhmun a inthlauh dan tarlan niin, district hrang hrangte ṭhan dan pawh tarlan a ni bawk. Sangtam chuan Gross State Domestic Product (GSDP) chu state sum leh pai dinhmun hriat nana tehfung pawimawh ber a ni tih a sawi a, Nagaland GSDP chu Rs vbc 39,566 vela chhut niin 7.73% in an ṭhang niin a tarlang.

GSDP chu tehfung pawimawh tak ni mah se state chhunga district hrang hrang ṭhan dan teh nan leh hmasawnna kai rual dan en nan DDP chu a pawimawh dawn a ni tih a sawi a, Nagaland-in hmasawnna rualkhai zawk a neih theih nan leh district hrang hrang hmasawn theihna lai hriatfiah theih nan DDP chu a pawimawh tih a sawi.

District Domestic Product report an tihchhuahah hian Dimapur district chu GDDP nei sang berin Rs nuai 5,43,611 ang velin district DDP chu chhut a ni a, Longleng district chu a hniam ber niin DDP Rs nuai 62,112 hu anga chhut a ni. Sangtam chuan district hrang hranga mimal sum lakluh (per capita income) dan tarlang bawkin, Dimapur chu a chung berah awmin Rs 1,54,002 pci a nei a, Mon district chu a hniam ber niin Rs 77,738 pci anga chhut a ni. Sangtam chuan sorkar hnathawkte chu mipuite hmasawn nana thawk turin a chah bawk a ni.

Nagaland chief secretary, Dr J. Alam pawhin DDP report an tichhuak theih chu lawmawm a tih thu sawiin data dik leh felfai taka tihchhuah a pawimawh thu a sawi. Alam chuan state chhungah hmasawnna a kai rual lo tih sawiin, Nagaland hmasawn dan chungchanga zawhna awm tam tak chu DDP report hian chhanna a pek theih ngei a beisei tih a sawi. Nagaland CS chuan department hotute chu Statistics department ṭha taka thawhpui tura chahin, data dik taka pe ṭhin turin a hrilh bawk.