Meghalaya : Cybercrime hluar vangin Police-in mipuite fimkhur turin chah

Meghalaya police chuan state chhungah cybercrime complaint a a lut nasa tih sawiin, kumtir aṭanga June 4 thleng khan complaint 586 an lut tawh tih an tarlang. Hemi a nih avang hian Meghalaya police-te chuan mipuite chu internet an hman laiin fimkhur turin an chah.

Special Superintendent of Police (CID) Vivek Syiem chuan digital crime chuan pun lam a pan zel tih tarlangin, mipuite chu an mimal thil leh sum dinhmun chungchangah fimkhur turin a chah. Syiem chuan kum 2019 khan complaint pakua chauh a lut tih a sawi a, 2020-ah 118, 2021-ah 224, 2022-ah 735 leh 2023-ah 895 a ni tih a tarlang.

Rampum huapin sum lama inbumna chu a hluar ber a, case zawng zawng zinga 70% zet chu sum lama inbumna kaihhnawih a ni. Hemi tih loah chuan 'parcel scam' an tih, thil chah deliver tur anga insawi, mahse an thil chahah chuan sorkar phal loh thil awm ang a chahtute hrilh a, police lem biak tira tihluihnaa pawisa dil chu a hluar hle bawk a ni.

SP Syiem chuan mipuite chu hmelhriat loh call an dawn lakah fimkhur tura chahin, mi pawimawh tak anga insawite lakah fimkhur lehzual turin a ngen. Hetianga call ṭhin tute hnenah hian an mimal thil hrilh lo tur leh, application eng emaw install tura an tihte chu install lo turin a chah a, hetianga call an dawnna number chu block zel turin mipuite chu a chah bawk.