Tuilian laka inven nan dil 50 chuang siam Amit Shah in a rawt

Union Home Minister Amit Shah chuan hmarchhakah tuilian a tlem theih nan, Brahmaputra lui lian tur ven nan dil 50 vel siam a rawt. Amit Shah kaihhruaina hnuaiah Pathianni khan tuilian buaipui dan tur sawi ho niin, tuilian a tlem theih nana hmalak dan turte sawi ho a ni.

India hmarchhak chu tuilian vanga harsatna tawk an tamna hmun niin, kumtin tuilian vangin hmarchhak state ṭhenkhat chuan harsatna an tawk ṭhin a, hemi ven nan hian Shah chuan dil lian tak 50 aia tlem lo, Brahmaputra lui tui a kuang aṭanga liam luhna tur siam a rawt a ni. Heng dil liante hian Brahmaputra lui kuang aṭanga tui chhuak chu an lo dawng anga, tuilian venna ṭha tak a nih dawn bakah loneitute tan tui hnianghnar zawk a awm theih phah dawn a ni. Dil lian siam a nih chuan khualzin hip nan pawh a ṭangkai thei dawn niin Shah chuan a sawi.

Union Home Minister chuan Indian Space Research Organisation (ISRO) in satellite hmanga thlalak an pek chhuah chu tuilian laka inven nana hmang ṭangkai turin thawktute a chah. Tuilian laka an him zawk nan ramchhunga state leh union territory te chu National Disaster Management Authority (NDMA) thurawn ngaipawhmawh turin a chah bawk. Shah chuan tun hnaia tuilian vanga buai, Manipur leh Sikkim chungchang zirchiang turin department te chu a chah a, MHA hnenah report thehlut turin a hriattir bawk.

New Delhi-a meeting-ah hian tuilian leh tui indaih lohna chungchanga hma lak dan tur hrang hrang sawi ho niin, Amit Shah chuan India Meteorological Department (IMD) leh Central Water Commission (CWC) chu tuilian tur hrilhlawk nana an khawl hmante thawm ṭhat hna an kalpui mek chu a rang thei ang bera zo turin a chah. CWC flood monitoring centre chu mamawh dan anga hman theih a pawimawh tih sawiin, Shah chuan khawchin, ruah sur dan leh tuilian hriattirna tura department hrang hrangin application an siam chu mipuiten ṭangkai zawka an hman theih nan application pakhata chhunkhawm mai ṭha a tih thu a sawi bawk a ni.