Meghalaya sorkarin dan loa lungalhthei laih chhuah a chhui dawn

Meghalaya sorkar chuan South West Khasi Hills district-a dan loa lungalhthei laih chhuahna a awm nia sawi chu chhui chian hna a kalpui ṭan. Meghalaya Mining and Geology department Secretary, RP Marak chuan ni sarih chhungin report kimchang thehlut hman turin a hriattir.

South West Khasi Hill (SWKH) district-a Nonghyllam police station huamchhungah dan loa lungalhthei laih chhuah hna Skindford Nongbri chuan a kalpui nia hriat a ni. Hemi chhui chiang tur hian SWKH district Deputy Commissioner chu Mining & Geology department Secretary chuan a ruat a, uluk taka chhuichian hna kalpui tur leh ni sarih chhunga report thehlut hman turin a ti a ni. DC report thehluh hi Justice (Retd) BP Katakey ngenna angin a hnenah thehluh ve leh tur a ni ang.

He thubuai chhuinaa DC pui tur hian SWKH district Superintendent of Police (SP) chu ruat a ni bawk. Dan loa lungalhthei laih chhuah hna kalpui anga an puhna hi a dik a nih chuan na taka hrem tura hriattir an ni a, thil tisualtute chu Mines & Mineral (Development and Regulation) Act, 1957 hnuaiah hremna pe ngei turin thupek tihchhuah a ni.