Manipur : Valley district-ah venhimna tihkhauh vangin lungawi lo

Manipur-a Imphal phairuama district hrang hrangah vehimna tikhauh tura security force dahluh belh an nih vangin valley district hrang hrangah lungawi lohna Pathianni khan lantir a ni. Lungawi loh lantirna hi valley district a hmeichhe pawl- Imagi Meira, AMKIL leh Meira Paibi pawl dangte kaihhruaina hnuaiah neih a ni.

Lungawi lohna lantirtu zinga a tam zawk chu hmeichhia niin, Manipur chief minister N Biren Sing leh governor Anusuiya Uikey hnenah resolution an thehlut a, state sorkar chuan dan kenkawh chu mi dang tel loin kutken se an tih bakah Article 355 puan chu tihtawp nise an duh a, hemi bakah hian security adviser chu ban an duh tih an tarlang bawk. Manipur Home department chu venhimna kalpui tura an duh thu sawiin, village volunteer-te chu man ni tawh lo se an ti bawk.

Mipui pung khawmte chuan Central Paramilitary Forces dahluh belh an ni chu sawiselin Assam Rifles chu Kuki-Zo hnamte pui ṭhinah an puh a, state sorkar hotute chu Manipur buai dan dik tak sorkar laipui hnena hrilh tura an duh thu an sawi a ni. Village volunteer-te chu khaw venghimtu pawimawh tak an ni tiin Manipur hmeichhiate chuan an lam an ṭang tlat dawn tih an sawi bawk.